Тури-потпечи, сутлијаш, зелник, ванилици, сучена кора, девет табани беа дел од специјалитетие со кои учениците од 5-а од ООУ „Кочо Рацин“ ги пречекаа учениците од 4-1 од ООУ „Кире Гаврилоски-Јане“.
Имено, по повод 20 ноември, Меѓународнот ден на детето, учениците од четврто еден од ООУ „Кире Гаврилоски-Јане“ со нивната наставничка Розита Кареска, беа во посета на учениците од 5-а и нивната наставничка Наташа Мирческа во ООУ „Кочо Рацин“.
Домаќините го реализраа својот час по изборниот предмет Готвење, но бидејќи се уште се малечки и не умеат да ги зготват сите традиционални специјалитети, тие напомош ги викнаа нивните вредни златни бабички кои со радост приготвуваа за нивните внучиња и за гостите од другото училиште.
Оваа необична и многу иновативна активност е идеја на наставничката Розита Кареска, која размислувајќи на кој начин да го одбележи овој ден, дошла до решение кое е навистина необично, акцја во која децата уживаа и научија многу за традиционалните рецепти, за вкусовите кои веќе се забораваат, а преку раскажувањето на бабите научија какво било нивното детство во минатото.
Бабите со радост раскажуваа за нивните омилени јадења кога тие биле деца, но им ги пренесоа и рецептите од специјалитетите кои ги имаа подготвено.
Домаќините беа навистина широкогради во однос на пречекот, но и гостите не останаа покусо, па на превкусната храна, возвратија со пораки за детството, честитки и стихови кои ги претставија пред нивните поголеми другарчиња, пред нивните баби, пред наставничките и пред директорката на ООУ „Кочо Рацин“.
Ова е еден од начините за добра наставна пракса, која заслужува внимание, а е во интерес на поттикнувањето на љубопитност кај децата, иновативен метод на искствено учење што ги следи современите барања за интерактивна настава. Па, нека биде пример и за другите наставници!
–
