Донации во опрема за училишта, за старски домови, за здравствени установи, детски градинки, за установи за згрижување… Тие помагаат во цел свет, но фокусот им е кон Македонија. Невладината добротворна организација се вика „Ханд тил ханд“ (Hand Till Hand) и работи во Шведска. Лицето на оваа организација се Марија и Тумас Русенгрен, Марија е Македонка по потекло од Битола, а Тумас е Швеѓанец кој татковината на својата сопруга ја чувствува како своја втора татковина.
Нивната организација „Ханд тил ханд“ е добитник на Третоноемвриско признание на Општина Прилеп за хуманиот и општествен ангажман во здравствената заштита. Како опстојува организацијата; кои се плановите и што ги мотивира овие добротворци разговаравме во програмата Радио што се гледа.
На самиот ден од свеченоста тие врачуваа донација за ЈОУГД „Наша иднина“ Прилеп – четири стоматолошки столови. Но ова е само дел од нивната пожртвуваност да се помогне и да се биде човек таму каде што е најпотребно. Секако помош е неопходна и од Македонија, а за тоа во Прилеп е задолжен Пајо Јанески од Шпедиција ВАП 97 кој се грижи за процедурите за пристигнување и употреба на донациите да се одвиваат без застој.
