Прилеп се подготвува за одбележувањето на 3 Ноември, Денот на ослободувањето на градот од фашистичката окупација . По тој повод Општина Прилеп и Советот на Општина Прилеп ги покануваат граѓаните да се приклучат на одбележувањето 81 година од ослободувањето на градот (1944–2025), кој годинава се одбележува под мотото “Минатото со гордост – Иднината со визија“, како симбол за потсетување да не се заборави минатото, а да се делува со визија за иднината на градот.
Годинава по долго време по повод 3 Ноември, Денот на ослободувањето на Прилеп на “Патеката на славните“ ќе биде поставена нова ѕвездена плоча со името на Коста Смилески, прилепчанец еден од најдобрите флејтисти во Македонија, деец на македонската народна музика и еден од основачите на КУД “Мирче Ацев“, роден во Прилеп 1939 година – починал 1995 година во својот роден град.
Инаку, одбележувањето на Денот на ослободувањето на Прилеп е 81 годишна традиција која претставува момент за почит кон историјата и инспирација за идните генерации. По тој повод ќе биде положено свежо цвеќе на спомен обележјата на паднатите борци и ќе се одржи свечена седница на Советот на Општина Прилеп, со доделување на дипломи и признанија на институции и поединци кои оставиле белег и придонеселе со својата работа за развојот на градот.
