„Културата е душата на еден град, а Прилеп отсекогаш бил препознатлив по својата богата уметничка традиција, по театарот, музиката и бројните културни настани кои ја одразуваат креативната енергија на прилепчани“, нагласи кандидатот за градоначалник на ВМРО ДПМНЕ и Коалцијата, Дејан Проданоски, на денешната прес конференција пред ЦК „Марко Цепенков“.
„Затоа, во програмата на ВМРО-ДПМНЕ и коалицијата, посветуваме посебно внимание на унапредување на културната инфраструктура за да создадеме современи услови за нашите уметници и културни работници, но и за граѓаните кои ја сакаат и ја живеат културата. Еден од најзначајните проекти е комплетната реконструкција на Театарот „Војдан Чернодрински“, симбол на прилепската театарска традиција и гордост на нашиот град. Просторот ќе биде целосно обновен, со нов кров, современ ентериер и уредување на хортикултурата околу објектот. Ќе се искористи постоечката архитектура и одличната акустика на салата, со што ќе се добие модерен театарски дом, достоен за нашиот театарски ансамбл и за сите љубители на сценската уметност. Со оваа реконструкција, прилепчани ќе добијат репрезентативен културен објект, каде ќе гледаме нови премиери, фестивали и современи театарски продукции. Паралелно со тоа, ќе се реализира и реконструкција и пренамена на просторот кај поранешната стара библиотека, кој со години е запоставен и нефункционален. Со овој проект, таму ќе се формира градска галерија и мала концертна сала. Ново живо културно јадро, каде ќе се одржуваат изложби, камерни концерти и настапи на млади уметници од Прилеп. Третиот значаен проект е внатрешната реконструкција, надградба и доградба на Националната установа, Центар за култура „Марко Цепенков“. Со тоа оваа институција ќе добие нов, модерен изглед и уште подобри услови за работа. Центарот ќе продолжи да биде срцето на културниот живот во Прилеп, дом на бројни фестивали, концерти, театарски претстави и промоции кои ја негуваат традицијата и го поттикнуваат културниот развој на нашиот град. Прилеп заслужува да биде регионален центар на културата, како град кој не само што ја чува својата традиција, туку создава нови вредности и ја поддржува идната генерација уметници. Со овие конкретни и реални проекти, ВМРО-ДПМНЕ и коалицијата докажуваат дека се единствениот вистински избор за Прилеп. Избор кој носи развој, грижа и вистински напредок за нашиот град и за сите прилепчани.“,итакна тој.
