Претставниците на Сојузот на тутунски здруженија на иницијатива на ресорниот министер Трипуновски, одржале состанок со претставници на откупните компании по најавата на откупувачите дека ќе го зголемат интензитетот на откуп. На средбата тутунарите им предочиле дека реколтата не е потешка од 16 милиони кгр и дека проценката на откупувачите е погрешна.
– Се договоривме откупувачите да не тактизираат, да го почнат поинтензивно откупот, да не ги нервираат тутунари, за да може тутунот да се откупи побрзо и полесно. Се договоривме ако сакаат по класи да го откупуваат тутунот, треба драстично да ги зголемат цените. Но тоа за оваа година нема шанси да го направат.Бараме од откупувачите со анекс на договор да си ги корегираат цените и да дојдат од 420 денари по килограм просек и да бидат задоволни и откупувачите и тутунарите. Откупувачите мудро молчат не спомнуваат никаква цена, посочи Ристески.
Тутунарите остануваат на ставот за повисоки цени и не отстапуваат од тоа. Бидејќи како што велат крајно време е да се обезбеди стабилност во секторот тутунопроизводство, што ќе значи фер пазарни односи. Доколку не се случи тоа, Сојузот на тутунски здруженија ќе бара замена на ориенталниот тутун со други земјоделски култури.
– Оваа година ќе заврши – прашањето е што до година? Што ќе купат до година? Затоа инсистираме средба со потсекторската група за тутун, со поддршка на министерот, да бараме нови гранки, нови култури. Со тоа ќе им докажеме на откупувачите дека земјоделците ќе си го најдат чајрето, значи ќе ја заменат тутунската култура со други култури, така што губитници ќе бидат само откупувачите, вели Ристески.
Во однос на линеарната субвенција од 100 денари за кгр, Ристески посочи дека тоа било меѓу првите барања на Сојузот, и дека е задоцнето барањето на опозициската партија. Во првата недела од почетокот на раниот откуп, преземени се околу 20 тони тутун, по просечна цена од околу 370 денари, при што преовладува проценката во прва класа. Најава за зголемување на интензитетот на откуп има за од понеделник, 25 ти ноември со отворање на 50 отсто од регистрираните пунктови на речиси сите откупни компании.
– Сметаме дека ќе се зголеми интензитетот на откуп. Но ако не се зголемат цените, не излезат со анекс договори откупувачите – ќе биде тешко и оваа реколта за откупување, вели Ристески.
Најголем интензитет досега во откупот има Источна Македонија, битолско и долненско во Дебреште. Во Прилеп е многу мал интензитетот и се откупуваше само во еден пункт. Засега Тутунски Комбинат нема најави за почеток на преземање на реколтата и покрај најавите на новото раководство дека се е подготвено за старт.
