Општина Прилеп и оваа година се приклучува на националната акција „ГЕНЕРАЛКА ВИКЕНД 2025“ која што ќе се одржи утре петок, 9 ти мај. Планирано е акцијата да започне од 9 часот и 30 минути кај Вештачкото езеро Прилеп. По тој повод Општина Прилеп упати повик до сите кои се во можност со својот личен придонес да се вклучат за почиста, здрава и еколошка средина:
„Почитувани сограѓани,
и оваа година Општина Прилеп се приклучува на националната акција „ГЕНЕРАЛКА ВИКЕНД 2025“!
Оваа година чистиме на 9 мај (петок). Се среќаваме во 09:30 часот кај Вештачкото езеро Прилеп.
Ве повикуваме сите кои сте во можност да се вклучите и заедно да ја исчистиме нашата околина.
Да дадеме личен придонес за почиста природа и поздрава животна средина!
Да се извалкаме за Прилеп да биде почист, стои во објавата на социјалната мрежа Фејсбук
Најголемата годишна национална акција за собирање отпад – ГЕНЕРАЛКА ВИКЕНД (волонтерска акција од граѓаните за граѓаните) ќе се реализира по петти пат претстојниот викенд започнувајќи од утре, петок, 9ти мај.
Акцијата е поддржана и од ЗЕЛС, Црвен крст и Министерство за животна средина. Над 20.000 волонтери ќе се вклучат во еколошките акции на повеќе од 500 локации во сите општини низ земјава, вклучувајќи над 600 организации, институции и компании, еколошки, граѓански, спортски здруженија, пензионерски организации, јавни институции, локални и урбани заедници, градинки, училишта, факултети, волонтери и национални паркови.
