Во фоајето на Центарот за култура „Марко Цепенков“ во Прилеп денеска, во присуство на голем број посетители, беше отворена изложбата „Вечито – Богдан Богдановиќ“. Изложбата ги претставува резултатите од најновите истражувања на спомениците на Богдан Богдановиќ во Македонија, заедно со богата ретроспективна поставка на целиот опус на овој автор. Изложбата е поддржана од Општина Прилеп, во соработка со НУ Заводот за заштита на спомениците на културата и музеј од Прилеп.
Во текот на минатата недела како предвесник на изложбата беа реализирани работилници за деца и млади кои на креативно-ликовен начин го запознаа уметничкиот свет на Богдановиќ, но и сопственото културно наследство на локалитетот „Могила на непобедените“. Работилниците се одржуваа под менторство на историчарката на уметност Аида Шарац-Бербиќ, музејски едукатор.
Изложбата ќе биде отворена до 25 октомври. Во рамките на придружната програма премиерно ќе биде прикажан и филмот „Делото на Богдан Богдановиќ видено од земја и од небо“ (88 мин.) од Предраг Новаковиќ и дигиталната училница „Вечито – Богдан Богдановиќ“.
Еден од многуте наследства на Богдановиќ е споменикот на паднатите борци од НОБ во Прилеп, Могилата на непобедените, меморијален комплекс изграен 1961 година во чест на загинатите борци од НОБ .Богдановиќ има изработено уште 20 монументални споменици посветени на жртвите на фашизмот и НОБ, изградени низ целата СФРЈ од почетокот на 1950-тите до почетокот на 1980-тите години.
