Прилепските пчелари се задоволни од годинешните приноси од мед и пчелни производи бидејќи во споредба со лани, годината беше временски поповолна. Пчеларското Здружение Братство во чија што организација е традиционалниот Фестивал на медот во Прилеп го зголемува бројот на членки за кои на редовна основа се спроведуваат едукации и учество на саеми во земјава и странство.
Во Прилепскиот регион се околу 150 пчелари, а во здружението се 70-тина членови.
-Годината е просечна за приносите на мед. Имавме есенски, односно зимски загуби. Ако треба да оценуваме, оценката е 3 или 4. Бројот на пчелари се намалува, дури се преполовува. На тоа влијаат иселувањето, елементарните непогоди, намалувањето на сточарството, а и пожарите го земаат својот данок. Помошта од државата е мала, само 600 денари субвенции. Бараме да се зголемат субвенциите, зашто и тоа е еден од главните фактори за намалувањето на пчеларството како гранка, рече Дејан Бошкоски, претседател на Пчеларското здружение Братство.
Прилепскиот мед е познат и признат по својот квалитет бидејќи регистрираните пчелари работат домаќински и одговорно. Велат, се работи за храна, за здравје и затоа се посветуваат со особено внимание на работата која носи приход доколку реално се вреднува. Апелираат медот и другите пчелни производи да се набавуваат од познати пчелари.
– „Професионално се занимавам со пчеларство. Со семејството чуваме околу 240 пчелни семејства.Произведувам производи од восок, мед, полен, прополис,од матичен млег. Претежно пласирам на македонскиот пазар. Од пчеларството може да се живее, но треба поголема одговорност, сите постапки треба да бидат навреме и да се внимава со пчелите, зашто последните 15-тина години може често да се случи пчелите да ги снема во сандаците, едноставно да угинат. Треба да се зголеми маркетингот за продажбата на медот и на пчелините производи,“ вели Тони Јовески, пчелар од Прилеп.
На годинешниот Фестивал на медот 16 ти по ред, кој што започна денеска, со свои штандови на Плоштадот Методија Андонов Ченто, се претставуваат 20 тина пчелари од Прилеп и регионот и во наредниве неколку денови.
Настанот, традиционално е во рамките на чествувањата по повод 11 Октомври во Прилеп.
