Иселеници, затвореници, но и стари лица во домовите се запишани повеќе во избирачкиот список за овие локални избори споредбено со претходните во 2021.
Сепак иако бројката на лица кои се на привремена работа во странство е за 29. 539 поголема во споредба со претходните локални избори, а вкупно 112 илјади кои се запишани во посебениот избирачки список кои се одјавиле и се на привремена работа и престој во странство, сепак на овие локални избори дијаспората нема да има право на глас. Право на глас ќе имаат само оние кои во тој период ќе бидат вратени, па со уредна документација ќе можат да го остварат своето гласачко право.
112 илјади на привремена работа во странство
2162 на издржување казна затвор или притвор
450 лица во домови за стари лица
За 263, поголема е и бројката на лица што се во казнено поправните установи, а вкупно изнесува 2 162 гласачи кои се на издржување казна затвор или притвор. Во домовите за стари лица пак регистрирани се 450 лица со право на глас или стотина повеќе од последните локални избори.
На овие избори вкупно право на глас имаат 1.832.415 граѓани од кои 1.717.803 избирачи се запишани во редовните изводи на Избирачкиот список, додека другите 112.000 се на списокот за привремена работа или престој во други земји.
Најдоцна една недела пред изборите (до 10 октомври) болните и изнемоштените кои сакаат да гласаат дома треба да достават барања до Општинските изборни комисии со соодветна документација. Избирачите кои на денот на гласањето се наоѓаат на издржување мерка куќен притвор, а кои сакаат да гласаат, преку овластен полномошник треба да ја известат ОИК најдоцна три дена пред денот определен за гласање (14 октомври).
Гласањето за нив, како и немоќните и болните, за затворениците и лицата во старските домови избирачките одбори го спроведуваат на ден пред изборите односно на 18 октомври.
Буџет за локални избори 2025 – 9. 760 000 евра
Вкупниот буџет за одржување на локалните избори 2025 година изнесува 9 милиони 760 илјади евра, од кои две третини се пари наменети за медиумите и платеното политичко рекламирање.
Дополнително на овие пари е и сумата за надоместоците на членовите на избирачките одбори и транспортот и дистрибуцијата на избирачкиот материјал до избирачките места каде што ќе се гласа, бидејќи тие ги обезбедуваат локалните самоуправи.
Според Изборниот законик, локалните избори се одржуваат на секои четири години во втората половина на октомври. Локалната самоуправа е организирана во 80 општини и Градот Скопје како посебна единица на локалната самоуправа. Локални избори во Македонија се одржале во 1996, 2000, 2005, 2009, 2013, 2017 и 2021 година.
