Во ремките на овогодишното издание на фестивалот на хуморот и сатирата „Ин Виница веритас“ вечерва ќе биде одиграна театрската претстава „Животот е краток и нејасен“ на Алтернативен театар „Отпишани“ од Скопје во режија на Гжегож Кемпински, најавуваат од ДК „Тошо Арсов“ од Виница. Претставата започнува во 20 часот. Главните улоги ги играат Гоце Тодоровски, Благој Чоревски, Марија Лазарова, Јасмин Рамани, Кирил Трајковски – Максим и Ивана Стамевска.
„Ин Виница веритас“ започна на 24 октомври со изложба од карикатури што учествуваа на конкурсот распишан на тема: „Кој последен се смее…“. Оваа престижна манифестација ја отвори министерот за култура и туризам Зоран Љутков.
Годинашното издание на „Ин Виница веритас“ завршува утревечер со стенд ап комедијата на Надица Петрова од Театарот „Златен елец“.
Сите претстави се играат во Сината сала на Општина Виница.
Содржината на објавата е сопственост на Радио Кочани.
