Синоќа, во градската библиотека „Борка Талески“ во Прилеп, по повод Меѓународниот ден на жената, а во рамките на програмата на Библиотеката, се одржа промоција на книгата „Жени во македонската книжевност од 19 век“ и предавање од авторот д-р Славчо Ковилоски.
Настанот го отвори директорката на библиотеката Андриана Ристеска, а модератор беше поетот и новинар Филип Димкоски.
Пред многубројните посетители, меѓу кои и советничката на Општина Прилеп, Ирена Стерјоска, претставници на прилепските образовни институции, членови на Друштвото за наука и уметност-Прилеп и Клубот на литературните творци-Прилеп, професорот, поет и истражувач д-р Славчо Ковилоски мошне инспиративно зборуваше за жените од македонската книжевна историја за кои многу малку се знае и за кои многу малку е зборувано и истражувано.
Книгата „Жени во македонската книжевност од XIX век“ од Славчо Ковилоски објавена е во издание на Институтот за македонска литература. Книгата, за првпат во македонската книжевна наука, на едно место нуди биографии на досега непознатите или малку познати македонски жени со кои започнал развојот на македонското женско творештво („женско писмо“). На таков начин, се надминува сликата за немоста на македонските жени и ним им се овозможува како авторки да го заземат своето место во македонските книжевни канони.
Во книгата „Жени во македонската книжевност од XIX век“ застапени, односно обработени се петнаесет женски ликови, авторки кои со своето книжевно перо, оставиле белег во македонската книжевна историја. Целта за популаризацијата на овие авторки е истите што повеќе да продрат во јавниот, општествениот и книжевниот денешен живот во Македонија-рече авторот на книгата д-р Славчо Ковилоски.
Славчо Ковилоски (Скопје, 1978) е македонски книжевен историчар, културолог, поет, прозаист. Автор е на неколку прозни, поетски и монодрамски дела, како и на повеќе монографии од областа на книжевноста, историјата и културологијата: Македонското женско творештво во XIX век, Патописот во македонскиот XIX век, Речник на псевдонимите во македонската книжевност од XIX век, Од Прличев до Конески (студии), Отворени страници (есеи и критики), Деспот Ба- џовиќ, непознати страници за еден Македонец, Прилеп и При-лепско во XIX век (културно-историски процеси), Културната преродба во Прилеп во XIX век и др.
Автор е на одредницата за просветата и културата во Прилеп и Прилепско во XIX век во енциклопедиската монографија: Прилеп, милениумско пулсирање 1014-2014. Прикази и статии објавувал во повеќе македонски списанија, како и во дневните весници: Нова Македонија и Време. Славчо Ковилоски е визитинг професот на неголку универзитети во регионов, добитник е на државната награда „Гоце Делчев“ за особено значајно остварување од интерес на Република Македонија во областа на науката. Член е на Друштвото на писателите на Македонија и на Друштвото за наука и уметност-Прилеп.
