(ВИДЕО)„Ретки херои посилни од стакло“ најмладите го одбележуваат месецот на ретки болести

Со низа активности, игра и работилници прилагодени според возраста на најмладите и учениците основци, децата учат за ретките болести. Во фокусот на соработката на ЈОУДГ„Наша Иднина“ и  ООУ„Блаже Конески“  Прилеп денес во градинката „Бајка“ во населбата Точила се реализираше перформанс на тема на ретката болест Епидермолиза булоза. Четвртооделенците рецитираа, играа и пееја за  „Ретките херои, посилни од стакло“ за хероите кои се соочуваат со оваа ретка болест да им дадат поддршка и да покажат разбирање и емпатија.

„Денес го одбележуваме Месецот на ретки болести во рамки на меѓународниот проект „Ретки се“ реализираме заедничка активност со дечињата од две до три години од ЈОДГ „Наша Иднина“ и учениците од ООУ „Блаже Конески“ под менторство на наставничката Весна Арсиќ се’ со цел за подигнување на јавната свест за ретките болести. Преку едукативни и креативни работилници децата се запознаваат со ретката болест  Епидермолиза булоза, позната како болест на „децата пеперутки“. Преку оваа активност децата научија дека овие деца се соочуваат со огромни ризици. При тоа, тие не се кревки, туку се исклучително храбри и силни. Особено сакам да ја потенцирам овде храбрата и безрезервна родителска грижа и љубов која што ја имаат. Нашата порака со овие активности е многу јасна: поддршката, разбирањето, прифаќањето, емпатијата не смеат да бидат ограничени на еден ден и еден месец, туку треба да бидат дел од нашето секојдневие.  Ретките се инспирација и нивната реткост ги прави уникатни, “ рече Билјана Петкоска, директор на ЈОУДГ „Наша иднина“ Прилеп. 

Месец февруари, бидејќи е уникатен по бројот на денови, е по традиција Месец на ретките болести кога во светот и кај нас се одржуваат бројни активности посветени на ретките болести.