И по 14 месеци од големата кочанска трагедија, здружението „Супорт Кочани“ останува активно и посветено на поддршката на повредените и нивните семејства. Помошта продолжува секојдневно, а канцеларијата „Гнездо“ и понатаму е место каде граѓаните можат да добијат поддршка, информации и неопходна помош.
За активностите и функционирањето на здружението разговаравме со Ана Вучева, волонтерка која е дел од „Супорт Кочани“ уште од самиот почеток на неговото формирање. Таа посочи дека иако поминало повеќе од една година од трагичниот настан, потребите на повредените сè уште постојат, а поддршката од волонтерите и хуманите граѓани не смее да запре.
Во моментот на снимањето, просториите на „Гнездо“ ги посетија дел од повредените граѓани, кои подигнаа потребни лекарства и друга помош обезбедена преку здружението. Од разбирливи причини и поради почитување на нивната приватност, тие не сакаа да бидат снимани.
Од „Супорт Кочани“ велат дека ќе продолжат со своите активности и во наредниот период, со цел да им помогнат на сите на кои помошта им е потребна и да покажат дека Кочани не ги заборава своите сограѓани.
Овој продукт е изработен со финансиска поддршка од Европската Унија во рамките на проектот SMS Facility – Поддршка за малите медиуми од Западен Балкан, локално имплементиран од Фондацијата Метаморфозис. Содржината е единствена одговорност на медиумот и авторот и не ги одразува нужно ставовите, мислењата или вредностите на Европската Унија, Фондацијата Метаморфозис или проектот SMS Facility.
Содржината на објавата е сопственост на Радио Кочани.
