Во пресрет на големиот национален празник 11 Октомври во тек е четиридневниот Фестивал „Медот и пчелните производи, инвестиција во вашето здравје“ . На плоштадот Методија Андонов Ченто се претставуваат 15 тина пчелари од Прилеп и регионот , а манифестацијата е во организација на Пчеларското здружение Братство Прилеп, едно од најстарите здруженија на пчеларите во Македонија. Изложени се мед и други пчелни производи: матичен млеч, полен …, како и пчеларска опрема. Фестивалот за отворен го прогласи градоначалникот Борче Јовчески.
„Огромна благодарност до сите присутни учесници, затоа што се трудите да допринесете за подобро здравје кај нашите сограѓани. Здравје во тегла, е она што во овие четири фестивалски денови ќе им го понудите на Прилеп и прилепчани. Добивањето на медот е подарок од природата за сите нас. Природниот мед претставува единствена нерасиплива храна, која со тек на времето може само да го менува обликот но не и да се расипе. Оваа одлика ја истакнува неговата вредност и потврдува зошто оваа вкусна и здрава намирница била употребувана како природен засладувач уште во праисторијата,“ посочи градоначалникот Јовчески упатувајќи честитки до Пчеларското здружение Братство за успешната организација на фестивалот.
Фестивалот започна денеска среда, 10 ти октомври, а ќе се одржува до сабота 12 ти октомври.
