Јавните комунални претпријатија во Виница, Кочани и Берово ќе бидат опфатени со нов петгодишен регионален проект насочен кон зајакнување на нивната ефикасност, отпорност и финансиска стабилност. Проектот „Отпорни и ефикасни комунални претпријатија во МК“ е поддржан од Владата на Швајцарската Конфедерација преку Државниот секретаријат за економски прашања (SECO), со грант од 6,5 милиони швајцарски франци и дополнителна национална поддршка од 0,5 милиони франци. Тој ќе се спроведува во седум општини: Берово, Битола, Кочани, Куманово, Радовиш, Струмица и Виница. Во општините од источниот регион – Виница, Кочани и Берово – проектот ќе се фокусира на модернизација на водоводната и комуналната инфраструктура, намалување на загубите на вода и подобрување на енергетската ефикасност на јавните претпријатија. Дополнително, ќе се воведуваат современи системи за мониторинг и управување, како и решенија за поодржливо користење на ресурсите. Заменик-министерката за животна средина и просторно планирање, Ане Лашкоска, истакна дека инвестициите во комуналниот сектор директно значат подобри услуги за граѓаните и поголема отпорност на локалните заедници на климатски промени. Според неа, зајакнувањето на капацитетите на комуналните претпријатија е клучно за одржлив локален развој. Проектот предвидува и институционално јакнење на претпријатијата, подобрување на нивното финансиско работење и воведување европски стандарди во управувањето со водните ресурси. Очекувањата се дека ќе се намалат загубите во системите, ќе се зголеми енергетската ефикасност и ќе се подобри квалитетот на услугите за граѓаните. За општините Виница, Кочани и Берово, ова претставува значаен чекор кон модернизација на локалните комунални системи, што може да придонесе и за поголема атрактивност за нови инвестиции и унапредување на локалниот економски развој.
Содржината на објавата е сопственост на Радио Кочани.
