Во кругот на Територијалната противпожарна единица – Кочани денеска беше одбележан 20 Мај – Денот на пожарникарите, во присуство на пожарникари, доброволци и претставници на локалните самоуправи од регионот.
По повод празникот, ЕВН Македонија донираше четирицикл наменет за интервенции и гасење шумски пожари, со што дополнително ќе се зајакнат капацитетите на кочанските пожарникари.
Традиционалната награда за најдобар пожарникар во 2025 година му беше доделена на Горан Стојанов, кој зад себе има десетгодишно искуство во службата.
За најдобар доброволец беше избран Гоце Василков, кој е дел од самите почетоци на ДПД – Кочани.
Признанијата ги врачи градоначалникот Владко Грозданов.
Според командирот на ТППЕ – Кочани, Драган Апостолов, во текот на 2025 година биле реализирани вкупно 315 интервенции.
Градоначалникот Грозданов им упати благодарност на професионалните и доброволните пожарникари за нивната посветеност, пожртвуваност и професионален однос во заштитата на граѓаните и справувањето со пожарите и другите непогоди.
На свеченоста присуствуваа и градоначалниците на Чешиново-Облешево, Јорданче Костадинов, како и на Зрновци, Ванчо Митев.
Во рамки на одбележувањето, командирот Апостолов додели благодарници и на општествено одговорните компании што ја поддржуваат работата на единицата, меѓу кои ЕВН Македонија и Видео Лотарија на Македонија.
Содржината на објавата е сопственост на Радио Кочани.
