„Ротари клуб“ – Прилеп по повод 18 години од постоењето на организираното ротаријанство во Прилеп донираше 18 апарати за пасирање храна и 180 килограми овошје и зеленчук за потребите на ЈОУ Детски градинки „Наша иднина“ Прилеп. Децата во градинката „Гоце Делчев“ заедно со воспитувачите, опремени со капи и престилки се запознаа како се подготвува храната која што подоцна е преточена во вкусни и здрави сокчиња.
Поводот за донацијата е полнолетството на Ротари клуб Прилеп, а причината е нискиот процент на конзумирање на овошје и зеленчук на македонските деца и подигнување на свеста за здрава исхрана, потенцираше Орде Ѓорѓиоски, претседател на Ротари клуб Прилеп и посочи дека планирана е уште една донација од дополнителни 2 прочистувачи на воздух во наредните месеци за прилепските детски градинки.
„ Македонија е последна во Европа по консумација на овошје, бидејќи само 18% од младата популација јаде овошје, а само 21% од децата јадат зеленчук. Од друга страна фрапантен е податокот дека 31% од децата имаат зголемена телесна тежина, а 17, 5 од децата влегуваат во категорија која треба да се третира поради телесната тежина“, потенцираше Ѓорѓиоски од Ротари клуб Прилеп за причините при изборот на донацијата.
Изразувајќи благодараност за донацијата Билјана Петкоска, директорка на ЈОДГ „Наша иднина“ Прилеп рече дека во институцијата работи посебен тим кој што се грижи за правилна здрава исхрана кај децата.
„ Секојдневно ги планираме оброците да имаат разновидност, меѓутоа и да бидат нутритивно соодветно подготвени. Во текот на петте работни денови имаме различни подготовки за појадок, ручек и ужинки. Имаме и стручен тим кој работи на исхраната кај децата секојдневно, а имаме и обуки за подобрување на здравата исхрана,“ рече Петкоска, директорка на ЈОУГД „Наша иднина“ Прилеп.
Ротари Клуб Прилеп донираше претходно 21 прочистувач на воздух, апарати кои го подобруваат квалитетот на амбиенталниот воздух во објектите на прилепските градинки што пак придонесува за намален број дечиња кои отсуствуваат од градинка заради грип или настинки во периодот карактеристичен за вакви сезонски заболувања.
