Прилепска Победа, која се бори за опстанок и која се обидува да остане во второлигашкото друштво, доби 10 гола во својата мрежа на гости кај ГФК Охрид и декласирана и понижена се врати во Прилеп. Но, не по вина на младите фудбалери, деца, кои црвено-белиот дрес се обидуваат да го одбранат во оваа катострофална криза во кој се наоѓа клубот.
Ако се земе предвид разликата меѓу двата тима, и возрасно, и технички, и искуствено, резултатот беше очекуван. Но, на хартија, во историјата на ФК Победа-Прилеп ќе остане вечно спортскиот пораз 10:0, како понижување на тимот кој претставуваше име и стравопочит на фудбалската сцена во Македонија и на Балканот.
Овој резултат не е спортски неуспех, туку сигнал на длабоките проблеми во клубот кои моментно настапуваат со младинци, кои играат истовремено, и во младинската и во сениорската екипа, се со цел да се спаси клубот од распаѓање. За град како Прилеп, кој има децениска фудбалска традиција, вакви резултати се удар врз гордоста и довербата дека овој клуб можно е повторно да се издигне од мртва точка. Очигледно тоа е тешко остварливо!
Не запираат реакциите на фановите на Победа кои со гнев за ваквото понижување ги запалија социјалните мрежи и ги обвинуваат сите релевантни градски фактори и они кои се во спортот и наводно бараа соломоноско решение за опстанок, за сегашната негрижа и рамнодушност кон клубот.
Во следното коло Победа на стадионот „Гоце Делчев“ го пречекува Скопје. Најмалку што останува е натпреварот да се посети во голем број за да им се даде поддршка младите фудбалски деца, кои со сето свое почетно фудбалско знаење, волја, желба и сила, се обидуваат да играат и вештачки да ја одржуваат Победа во живот.
Но, сепак (како последна шанса), ако клубот не ја искористи оваа криза како пресвртна точка, ризикува да стане само фуснота во историјата на македонскиот фудбал.
