Со потпишувањето на управниот договор за финансиска одржливост на услугата „Помош и нега во домот“ обезбедено е долгорочно – системско решение. Имено, деновиве, Министерството за социјална политика, демографија и млади и Здружение Центар за развој и едукација Прилеп и партнерските општини потпишаа управен договор со кој се обезбедува финансиска одржливост на социјалната услуга „Помош и нега во домот“, наменета за стари лица со намалена функционална способност.
„Оваа соработка придонесува кон градење на интегриран, транспарентен, ефикасен и одржлив систем на социјална заштита, кој навремено и соодветно ќе одговори на потребите и предизвиците на ранливите групи и на населението на подрачјето на општина Прилеп. Со ваквите активности се потврдува заложбата на институциите, граѓанските организации, и локалната самоуправа за развој на достапни и квалитетни социјални услуги, насочени кон подобрување на благосостојбата и социјалната вклученост на граѓаните“, вели Марина Тошеска од Здружението Центар за развој и едукација Прилеп.
Преку оваа услуга, над 170 стари лица ќе имаат континуиран пристап до професионална помош и поддршка за независно и достоинствено живеење во сопствениот дом. Услугата ќе ја спроведуваат 58 обучени негуватели, што претставува значаен чекор кон унапредување на квалитетот на живот на корисниците, но и создавање позитивни социјални и економски ефекти за локалната заедница. Воспоставувањето и унапредувањето на професионални и квалитетни социјални услуги е заедничка заложба на општините Прилеп, Кривогаштани и Долнени, како и на ЈУ Меѓуопштински центар за социјална работа Прилеп.
Услугата „Помош и нега во домот“ започна да се спроведува во средината на 2023 та година по иницијатива на Здружението Центар за развој и едукација. Новата социјална услуга беше резултат на законските измени во областа на социјалната сфера од 2019 година. Услугата за помош и нега во домот влезе во системот на социјалните права на граѓаните и прерасна во обврска на ресорното министерство.
