Во просториите на НУ ЦК „Бели Мугри“ – Кочани, на 21 ноември се одржа ретроспективната изложба „Бучава што создава идентитет“, посветена на шест децении македонска рок култура, музика и поезија (1963–2023). Изложбата понуди визуелен и документарен пресек на развојот на македонската рок сцена преку внимателно селектирани фотографии од легендарни бендови, портрети на фронтмени и рачно испишани текстови од познати песни. Поставките го доловија духот на различните генерации што ја градеа оваа музичка традиција, прикажувајќи автентични материјали кои ја носат енергијата и естетиката на епохите што го обликуваа македонскиот рок. Сите фотографии беа поставени на канвас, а текстовите од песните беа презентирани во нивна оригинална форма – онака како што биле напишани од музичарите, фотокопирани и изложени во рамки. Комбинацијата од визуелни материјали, музички елементи и документарни содржини им овозможи на посетителите ретко и интимно доживување на развојот на македонската рок сцена. Настанот беше дел од пошироките активности за зачувување и валоризација на македонското музичко наследство, привлекувајќи голем број љубители на рок музиката и културната историја.
Д.Михајлов
Содржината на објавата е сопственост на Радио Кочани.
