На 21 ноември (петок), во 19:30 часот, во просториите на НУ ЦК „Бели Мугри“ – Кочани, ќе биде отворена ретроспективната изложба насловена „Бучава што создава идентитет“, посветена на 60 години македонска рок култура, музика и поезија (1963–2023).
– Изложбата претставува визуелна и документарна приказна за развојот на македонската рок сцена, преку внимателно одбрани фотографии од легендарни бендови, портрети на нивните фронтмени, како и уникатни рачно испишани текстови на песни – автентични документи кои ја носат енергијата, естетиката и духот на различните генерации што ја градеа оваа музичка традиција, најавува авторот, Тошо Филиповски.
Сите фотографии се поставени на канвас, а текстовите на песните се презентирани токму во нивната оригинална форма – како што биле напишани од музичарите, фотокопирани но и оригинални исписи ставени во рамки.
– Овој дијалог помеѓу слика, звук и збор овозможува ретко и интимно доживување на културниот развој на македонската рок сцена. „Бучава што создава идентитет“ не е само изложба – таа е потсетник на богатото творештво што низ децении го обликуваше современиот македонски културен пејзаж, смета Филиповски.
Изложбата е дел од пошироките активности за зачувување и валоризација на македонското музичко наследство.
Настанот е отворен за јавноста, а љубителите на музиката, историјата и визуелните уметности ќе имаат можност одблиску да ги видат овие ретки и значајни артефакти.
Локација: НУЦК „Бели Мугри“, Кочани
Датум и време: 21.11.2025, 19:30 часот
Со поддршка на Министерството за Култура и туризам и НУ ЦК Бели Мугри – Кочани
Организатор: Корпус Деликти Рекордс и Македонски рок музеј, архив и библиотека.
Содржината на објавата е сопственост на Радио Кочани.
