На образованието му потребен квалитет, а тоа подразбира итна департизација и предност на стручноста и компетентноста кај наставниот кадар. Тоа е првиот чекор што треба да го направиме ако сакаме младите да ги задржиме овде. За тоа треба да ѝ погледнеме на вистината в очи и оваа учебна година да се реализира со паралелки со број на ученици според пропишаните норми од Министерството за образование – вели в. д. градоначалникот на Кочани Венко Крстевски.
Според Крстевски, 90 проценти од блок-дотациите за образованието одат за плати на наставниците.
Училиштата заостануваат со развојот во делот на инфраструктурата, како на пример, недостига соодветна спортска сала.
Податоците од образованието во Општина Кочани укажуваат дека бројот на учениците константно е во пад.
Оваа учебна година во ОУ „Раде Кратовче“ во прво одделение се запишани 27 првачиња распоредени во 3 паралелки. Во подрачното училиште во с. Бели има 10 ученици во 2 паралелки; во с. Нивичани 5 ученици во 2 паралелки; во с. Тркање 28 ученици во 2 паралелки; во с. Грдовци 17 ученици во 2 паралелки и во с. Прибичево 4 ученици во 1 паралелка.
В. д. градоначалникот на Општина Кочани додава дека во малубројни паралелки на учениците им е скратена можноста за квалитетна социјализација, учество на патрони празници и воннаставни активности што ги имаат нивните врсници во централните училишта.
Крстевски нагласува дека токму тоа против што се бори – партизацијата – во образованието е на најјако, што го илустрира со согласност за помал број паралелки од МОН, документ којшто претседателот на Советот на Општина Кочани го прикажал на денешнава координација на Советот, а којшто сѐ уште не е пристигнат во Општина Кочани.
Содржината на објавата е сопственост на Радио Кочани.
