Иако се наоѓа во самото градско подрачје на Кочани, населбата „Дневна нега“, која го носи името по некогашниот погон на индустрискиот гигант АТОМ, со децении е целосно заборавена од надлежните институции.
Жителите велат дека инфраструктурата е во катастрофална состојба, а условите за живот се како во рурална, планинска средина.
„Цели 35 години чекаме нешто да се направи. Секој доаѓа, ветува, и ништо. Овде нема асфалт, нема одвод, нема ништо“, вели еден од жителите.
Преку населбата минува десниот магистрален канал, кој со својата длабочина и отворена структура претставува опасност – особено за децата, за најмалите и за домашните животни. Жителите бараат овој дел од каналот да се покрие, како што е решено на други локации во градот.
Дополнителен проблем е и неасфалтираниот крак долг околу 40 метри, кој ги поврзува улиците „Енѓелсова“ и „Ѓорѓи Пулевски“. Поради негрижата, по секој дожд улиците се полни со кал, камења и наноси кои се разлеваат по целата должина од околу 500 метри – од населбата, па се до салонот за автомобили „Аuto Welt“.
Запушените атмосферски одводи само го влошуваат проблемот, а прашината и калта се секојдневие за жителите.
„Ова не е живот. Се прашуваме дали сме во Кочани или некое планинско село. До кога вака?“ – ни рече уште еден жител од населбата.
Нивното разочарување е големо. Велат: милиони проекти се најавуваат, а реализацијата е – нула.
Додека локалните власти најавуваат нови урбани проекти, граѓаните од населбата „Дневна нега“ бараат итно решение на нивните секојдневни проблеми. Прашуваат – дали некој конечно ќе ги посети и ќе се заинтересира барем да ја разгледа оваа тематика што секојдневно ги мачи жителите?
Содржината на објавата е сопственост на Радио Кочани.
