Денеска, понеделник, 18 август, во Кочани, активностите од програмата на ЦПЦА Малинска – „Лето во друштво“, продолжуваат!
Вечерва од 18 ч., во дворот на Библиотеката „Искра“ ќе се одржи музичката работилница – „Инструменти од светот“. Не е потребно никакво предзнаење од исполнување на некаква музика, туку само добра волја да се истражува, сака и заеднички да се креира музика, порачува организаторот.
Исто така од 18 ч во СОУ „Љупчо Сантов“ предвидени се низа спортски активности, а од 19 ч. во Шаховскиот клуб „Кочани“ ќе се игра шах со Емил Ристевски, најмладиот македонски интернационален мајстор.
Програмата „Лето во друштво“ во Кочани започна на 15. август и минатата седмица беше исполнета со повеќе настани.
Покрај другото, младите учествуваа во фотографската работилница за цијанотипија, а во СРЦ „Бавчалук“ и во Градскиот парк создаваа мандали – уметнички инсталации на отворено – со природни материјали: камчиња, листови, шишарки…
Ја истражуваа улицата со фотографски апарат и во секојдневието ловеа човечки емоции, движења, симболи, уникатни моменти и елементи од урбаниот простор.
Активностите од „Лето во друштво“ во Кочани завршуваат на 23 август.
Содржината на објавата е сопственост на Радио Кочани.
