Вашиот гест говори многу повеќе од зборовите. Му покажавте на целиот град, а и на постарите генерации, дека вистинските вредности живеат во младите. Дека љубовта, спомените и достоинството не се забораваат, туку се чуваат преку заедништво и култура.
Ова беше кажано синоќа пред отворањето на Расплет фестивалот што се одржува во Кочани на Споменикот на слободата и е порака од Зоран и Лидија, родители на Сара Јорданова, една од 62 – жртви во несреќата од 16 март.
Со длабока почит и искрена благодарност им се обраќаме на сите млади кои го организираа фестивалот посветен не само на Сара — со срце, со душа и со огромна љубов. Овој настан не е само музички концерт, туку моќна лекција за тоа како се оддава почит кон оние што засекогаш ќе останат во нашите срца, смета семејството Јорданови.
Организаторите пред почетокот на музичкиот дел од програмата, од сцената, ги прочитаа имињата на сите почиинати во пожарот во „Пулс“, по што првин следуваше аплауз, а потоа и минута молчење во нивна чест.
Сара Јорданова свиреше на тапани во „Корка“, кочански бенд од каде тргна идеата со организирање на музчки настан со хуманитарен карактер.
Причината за дводневното времетраење е да може да се привлече поголемо внимание кон Кочани и сите засегнати од трагедијата и да се собере што е можно поголем број на донации.
Донациите не смеат да запрат, бидејќи им се најпотребни на повредените кои чекаат на нив, порачаа организаторите на Расплет фестивалот, чија завршница е вечерва, а настапуваат Хајка, Taxi Consillium, Корка, Алембик, Јаблан, Don Playa, Луфтанза, Соба Глувих, Големата Вода, Mallard и DJ Gianni.
Содржината на објавата е сопственост на Радио Кочани.
