Со финансиска поддршка од Владата на Република Македонија, во Општина Зрновци започнува реализација на проект од стратешко значење — „Промена на секундарна водоводна мрежа“ во село Зрновци.
Станува збор за инвестиција во висина од 23,4 милиони денари, обезбедени преку националната програма за подобрување на водоводната инфраструктура. Општина Зрновци аплицираше за овој проект во 2023 година, а сега започнува практичната имплементација.
Средствата ќе бидат наменети за комплетна замена на дотраените и нефункционални краци од секундарната водоводна мрежа, кои досега често предизвикуваа дефекти, загуби на вода и незадоволство кај граѓаните.
Од Општината информираат дека проектот е технички сложен и долгорочен, но со значајни придобивки – безбедна и сигурна дистрибуција на чиста вода, намалување на дефектите и воспоставување одржлив систем за водоснабдување.
Локалната самоуправа го оценува проектот како уште еден доказ дека со одговорен пристап, визија и упорност, капитални инвестиции можат да се реализираат и во помалите општини.
Содржината на објавата е сопственост на Радио Кочани.
