Утре центарот на Кочани ќе биде сцена на свечено коњичко дефиле организирано од Здружението за развој на рурален туризам „Битолска коњаница Галоп“ од Битола, како дел од традиционалната манифестација „Патот на Илинденците“.
Настанот се одржува во чест на празникот Илинден, а годинава дефилето ќе има и посебна симболика – ќе биде посветено на жртвите од трагичниот пожар што се случи во објектот „Пулс“ во Кочани.
Коњаниците ќе започнат со дефилето во 9:00 часот од паркингот кај ресторанот „Але-Дар“, по што ќе се движат по улицата „Димитар Влахов“ до кружниот тек во населбата Стришани, продолжувајќи по булеварот „Стево Теодосиевски“ и улицата „Маршал Тито“ до зградата на Општина Кочани.
По кратка пауза пред општинската зграда, колоната ќе се упати по „Кеј на Револуцијата“ до Полициската станица, а потоа и до Градските гробишта, каде ќе биде оддадена почит на загинатите.
Во дефилето ќе учествуваат околу петнаесет коњаници облечени во традиционална комитска облека, како и други учесници кои ќе ја дадат својата поддршка на настанот. По завршувањето на церемонијата, коњаниците ќе се вратат на почетната точка, а целата манифестација се очекува да трае околу еден и пол час.
Содржината на објавата е сопственост на Радио Кочани.
