Големиот број жртви на експресниот пат Штип–Кочани повторно ја актуелизира потребата од итни мерки за зголемување на безбедноста. Само во текот на минатата година, на оваа делница се евидентирани четири сообраќајни несреќи со смртни последици, при што животот го загубиле шест лица.
Оваа сообраќајна артерија, која го поврзува источниот со централниот дел на државата, според експертите е една од најризичните во земјава. Иако се работи за експресен пат, истиот често се користи како автопат. Возачите ретко ја почитуваат дозволената брзина од 110 километри на час, особено поради фактот што трасата е рамна и без угорнини, што дополнително ги охрабрува на опасни маневри и претекнувања со голема брзина.
На критичните точки е поставена соодветна сигнализација, но тоа не е доволно, велат сообраќајните инженери. Како најефективно решение се посочува воведувањето на концептот „два плус два“, кој подразбира проширување на патот со дополнителни коловозни ленти во двата правци и нивно физичко разделување. Со тоа би се намалил ризикот од директни судири и сериозни несреќи.
Делницата, која е продолжение на автопатот Штип–Миладиновци, е пуштена во употреба во декември 2022 година. Сепак, статистиките покажуваат дека само инфраструктурата не е доволна без постојан надзор и строга контрола на сообраќајните правила.
Содржината на објавата е сопственост на Радио Кочани.
