Вработени во Комунална хигиена и Паркови и зеленило во КЈП „Водовод“, Празникот на трудот, 1 Мај го поминаа работно, расчистувајќи ги јавните површини од отпад и уредувајќи ги зелените делови по текот на Кочанска Река.
Со нив беше и в. д. градоначалникот на Кочани Венко Крстевски, кој лично помагаше во одржувањето на јавната чистота истакнувајќи дека Кочани мора да го врати ликот на чисто и урбано место.
Градот мора да го средиме, само вредно и со постојана работа ќе успееме да направиме промени. Во Кочани веќе нема место за неработници, нема боја, нема страна и најбитно од сѐ нема партиска машинерија што ги штити. Времето на злоупотреба е завршено – истакнува в. д. градоначалникот.
Од самото стапување на функцијата вршител на должноста градоначалник, Крстевски успеа да го поттикне и граѓанскиот активизам со вклучување на поголеми групи граѓани што ја средуваат непосредната околина во микрозаедницата каде што припаѓаат.
Пример за тоа беа жители на Белското Маало коишто го доведоа до состојба на користење обраснатото во трева и напуштено детско игралиште и го собраа расфрланиот отпад од околината.
Следејќи го нивниот пример, граѓани од различни локации најавуваат поддршка на акцијата за комунално уредување на Кочани.
Содржината на објавата е сопственост на Радио Кочани.
