Јавниот обвинител и тимот што ја води истрагата за трагичниот пожар во дискотеката „Пулс“ во Кочани денеска се сретнаа со семејствата на загинатите, при што ги информираа за текот на постапката и одговараа на нивни прашања.
Обвинителството соопшти дека истрагата е сеопфатна и се разгледуваат сите можни аспекти на одговорност. Следна фаза ќе бидат распити на оштетените, а се очекуваат и резултати од низа вештачења во наредните денови. Ангажирани се истражители и стручњаци од различни области.
Истовремено, до граѓаните е упатен јавен повик за споделување на лични сведоштва и докази поврзани со клубот и вклучените институции, преку формулар достапен на веб-страницата на Обвинителството.
Семејствата денеска протестираа пред Обвинителството во Скопје, барајќи одговорност, оставки и формирање експертска влада. Остварија средби со пратеници од Левица, СДСМ и со лидерот на опозицијата, Венко Филипче, а се упатија и кон МВР, каде се очекува средба со министерот Панче Тошковски.
Во пожарот на 16 март загинаа 62 лица. Досега се осомничени 68 физички и три правни лица. Дискотеката „Пулс“ работела без лиценца и со сериозни пропусти во безбедноста. Пожарот бил предизвикан од пиротехнички ефекти за време на концерт на групата „ДНК“.
Содржината на објавата е сопственост на Радио Кочани.
