Директорот на Водостопанство Филип Филиповски денес оствари посета на подружницата „Брегалница“ во Кочани, еден од најзначајните хидросистеми за наводнување во Источна Македонија. Системот обезбедува вода за илјадници хектари земјоделски површини, а централна точка претставува акумулацијата Калиманци – клучен воден резервоар за целиот регион.
Во рамки на посетата, се одржа средба со земјоделци од селата Чешиново, Мојанци и Грдовци. Разговорите беа фокусирани на рационалното користење на водата за наводнување, како и на потребата од подобра координација и вмрежување меѓу самите водокорисници.
Пораката до земјоделците беше јасна – водата е од суштинско значење за стабилна и плодна земјоделска сезона. И покрај предизвиците поврзани со моменталниот водостој, се изрази надеж дека пролетните дождови ќе го подобрат хидролошкиот биланс и ќе овозможат непречено наводнување, без намалување на обработливите површини.
Надлежните упатија апел до сите земјоделци за меѓусебно разбирање, рационално управување со водните ресурси и активно учество во процесите на здружување и вмрежување, со цел заедничко обезбедување на успешна земјоделска година.
Содржината на објавата е сопственост на Радио Кочани.
