Мотивацискиот тренер и Д-р Жарко Костиќ, вечерва во Центарот за култура „Бели мугри”, одржа предавање на теми за тоа како граѓаните да се справат со негативни мисли и емоции и за тоа како да се намалат чувствата на болното минато, со оглед на тоа што го погоди Кочани на 16 март – пожарот во дискотеката „Пулс“.
Настанот почна со минута молк за починатите сограѓани, а во текот на предавањето, Д-р Костиќ говореше за важноста од прифаќање на сопствените чувства, развивање на внатрешна сила и изградба на здрави ментални навики.
Тој ги сподели своите експертски совети и практични алатки за секојдневно носење со емоционалниот товар, особено во време на лични и колективни трагедии.
Посебен акцент беше ставен на техниките за самопомош, но и на значењето на заедништвото и меѓусебната поддршка во процесот на закрепнување.
Предавањето привлече голем интерес при што салата беше исполнета.
Меѓу присутните беа и дел од повредените лица во дискотеката „Пулс“, нивните семејства, пријатели, како и многубројни граѓани кои дојдоа да се едуцираат.
Во рамките на настанот беше организирана и хуманитарна акција, каде посетителите можеа да донираат парични средства. Собраните донации ќе бидат наменети за помош на семејствата на настраданите, како израз на солидарност и заедничка грижа.
Д-р Жарко Костиќ ги охрабри сите присутни да продолжат да се борат, да веруваат во себе и да не се срамат да побараат помош кога им е најпотребна.
Во продолжение следува неговата изјава.
Содржината на објавата е сопственост на Радио Кочани.
