МВР привремено го затвори испитниот центар во Битола на кој му даде лиценца пред само три месеци.
Деновиве Министерството за внатрешни работи направило инспекција во битолски „Супер возач“ при што било утврдено дека Испитниот центар не поседува соодветна документација за потребниот стручен кадар и возила, а фирмата не водела и уредна еведенција. Битолскиот сообраќаен испитен центар „Супер возач“ ,во кои полагаат и кандидати од Прилеп, добил забрана за работа од 30 дена. Со ова кандидатите во Пелагонискиот регион ,за прва возачка дозвола или за дополнителна категорија, нема да може да полагаат најмалку до 13 септември оваа година.
Лиценцата за испитен центар во Пелагонискиот регион „Супер возач“ ја доби во првата половина на мај во трка со фирмата СИЦ „АМ“, која беше испитен центар до декември 2024 година. Првиот конкурс пропадна бидејќи МВР процени дека и двете фирми не ги исполнувале условите.
Од 15 декември, кога заврши лиценцата на претходниот испитен центар СИЦ „АМ“, па сè до 13 мај 2025 година кога лиценцата ја доби „Супер возач“ од Битола, немаше полагање за возачки испити во Пелагонискоиот регион. МВР, пред само три месеци и издаде лиценца на „Супер возач“, со заклучок дека ги исполнува условите да биде Испитен центар за полагање на возачки испити во Пелагонискиот регион за следните пет години.
Сега, со инспекцијата на МВР и казната од еден месец значат дека повторно нема полагање, почнувајќи од 12 август 2025 година. На интернет-страницата на „Супер возач“ тврдат дека така ќе биде најдоцна до 13 септември, што навестува дека фирмата се надева оти ќе ги отстрани недостатоците во дадениот рок.
Министерството за внатрешни работи (МВР) и официјално потврди за „360 степени“ дека битолскиот сообраќаен испитен центар „Супер возач“ добил забрана за работа од 30 дена.
Во одговорот се наведува и дека „Супер возач“ има рок од 30 дена да ги острани недостатоците. Ако се прочитаат законските и подзаконските акти на кои се повикуваат од полицијата во одговорот до „360 степени“, пак, станува јасно дека е можно и одземање на лиценцата за испитен центар за „Супер возач“. Така предвидува законот, ако испитниот центар не успее да ги отстрани забелешките во дадениот рок од 30 дена.
Повеќе на 360 мк
