На триесеттата седница на Генералната конференција на УНЕСКО, во 1999 година, 21 февруари е прогласен за Меѓународен ден на мајчиниот јазик. Во 2000 година пак, овој датум е промовиран како Ден на лингвистичката и културна разновидност и повеќејазичност.
Во повеќе образовни и културни институции низ Прилеп и во околината на различни начини беше одбележан овој ден.
Изложба на дела од македонски автори, напишани на мајчин јазик подготви Градската библиотека „Борка Талески“-Прилеп. Дел од поставката се делата на истакнати роднокрајни творци, кои дале свој исклучителен придонес за македонскиот јазик.
СОУ „Ристе Ристески Ричко“, Меѓународниот ден на мајчиниот јазик го одбележа со поетска вечер што се одржа синоќа во кафе Арт. На настанот, органзиран во соработка со Училишната ученичка заедница, учениците се претставија со рецитации и музика, посветени на значењето од постоењето и негувањето на мајчиниот јазик.
Светскиот ден на мајчиниот јазик беше одбележан и во СОУ „Орде Чопела“ Прилеп. На овој настан присуствуваа советничката од Биро за развој на образованието Оливера Тодороска, наставници и ученици од ООУ „Кирил и Методиј“ с.Канатларци и Гимназија „Преродба-Рилиндја“ – с.Житоше.
Учениците пак од ООУ „Блаже Конески“ од Прилеп, заедно со нивната наставничка Весна Црвенкоска, подготвија креативно видео по повод овој значен ден.
Овој ден го добележаа и учениците од прво до петто одделение со наставничата Аида Јорданоска, заедно со нејзините колешки од ПУ „Пере Тошев“ во с. Дреновци, Општина Долнени. На гости им беше поетот и новинар Филип Димкоски кој им читаше поезија, а тие му изрецитираа прекрасни песни на македонски, но ја запееја и македонската народна песна „Лилјано моме убаво“.
