Ротари клубот од Прилеп денеска врачи донација од 21 прочистувачи на амбиенталниот воздух, кои ќе бидат распределени во занималните простории во објектите на градинката во Вишне и Бончејца. Во иницијативата се вклучени голем број прилепски фирми кои ја препознаа потребата за почиста животна средина на децата од претшколска возраст.
„Вкупната вредност на проектот е околу 8, 5 илјади евра донации од правни и физички лица кои сакаат да помогнат да го реализираме проектот „Заедно за почист воздух во градинките во Прилеп. Искрено веруваме и работиме на тоа чистиот амбиентален воздух во градинките, да биде страндард и во училиштита во Македонија. Еве зошто: Светската здравствена организација во 2024 година констатирала дека во Македонија за двојно повеќе се надминуваат концентрациите на суспендирани честици во внатрешноста во градинките и училиштата од она што е утврден праг или дозволена граница од суспендирани честици. Овој факт не’ загрижи, а дополнително и УНИЦЕФ нашол во своите извештаи тоа го нотира дека 11,2 % од вкупниот број на смртни случаи на деца под една година се должи на загадениот воздрух,“ посочи Орде Ѓорѓиоски, претседател на Ротари клуб од Прилеп.
На примопредавањето на донацијата се заблагодари градоначалникот Борче Јовчески потенцирајќи дека локалната самоуправа обезбедила дополнителни прочистувачи за уште две градинки во рамките на ЈОУДГ „Наша иднина“ Прилеп.
„Локалната самоуправа ја препозна добрата намера на Ротари клубот од Прилеп. Локалната самоуправа обезбеди донација на прочистувачи на амбиентален воздух и на уште две големи градинки и ќе се потрудиме да обезбедиме прочистувачи за сите наши градинки,“ рече меѓу другото градоначалникот Јовчески.
ЈОУДГ „Наша иднина“ Прилеп згрижува 1482 деца. Листата на чекање во прилепските градинки е намалена со пуштањето во употреба на градинката во населбата Точила, заблагодарувајќи се на донацијата посочи Христина Трпческа, директорка на ЈОУДГ „Наша иднина“ Прилеп .
