Прилеп брои ситно – на помалку од месец дена е уште едно издание на Фестивалот кој што е синоним за градот, манифестација која со децении претставува предизвик за вљубениците на добра забава, атрактивни изведувачи – естрадни ѕвезди од Македонија и Балканот. Пиво Фестивалот годинава ќе се реализира од 18 ти до 20 ти јули, традиционално викендот по големиот православен празник Петровден. Се прават последните подготовки околу организацијата, посочи градоначалникот Борче Јовчески.
-Прилеп повторно ќе пулсира во ритамот на музиката, добрата енергија и долгата фестивалска традиција! Очекуваме десетици илјади посетители од целата држава и регионот, кои ќе уживаат во тридневната програма! Општина Прилеп, како традиционален поддржувач и домаќин на фестивалот, и оваа година преку Програмата за култура обезбеди поддршка од 1 милион денари, со што ја потврдуваме нашата заложба за поддршка на големите манифестации кои го збогатуваат културниот и туристичкиот живот на градот. Во координација со организаторите, веќе се работи на финалните подготовки. Јавните комунални претпријатија се целосно подготвени за хигиената, логистиката, паркингот и безбедноста – затоа што Прилеп знае како да биде одличен домаќин, рече градоначалникот Јовчески на денешната прес конференција.
Организатор на годинешното издание на Пиво Фестивалот е Vibe Event (Вајб Евент) Продукцијата од Скопје. Водител на манифестацијата ќе биде познатиот комичар Бојан Велевски, кој како што рече ќе се погрижи сите три фестивалски вечери да ги „зачини“ и со хумор.
– Програмата ќе започнува од 19 часот , се погриживме годинава покрај официјалната програма за време на фестивалските вечери да има дополнителна забава со познати диџеи на камената бина до раните утрински часови. Со свои штандови ќе се претстават 6 пивари со над 20 вкусови на пиво од Македонија и од странство. Скарата и пивото ќе биде присутна на 10 до 15 штандови, посочи Бојан Велевски од Вајб Евент Продукција.
Инаку вкупната финансиска конструкција за реализација на Пиво Фестивалот 2025 изнесува 100 илјади евра или околу 6 милиони денари, од кои 1 милион денари е обезбеден од општинскиот буџет како дел од средствата наменети за култура во општината.
