Авантурист по вокација, спасител по професија, човек кој што го води андреналинот да истражува, да руши граници, да запознава нови светови во длабочините и во височини. Подвизите и струшените рекорди на Дарко Неданоски пред 3 години беа поттик за режисерот Бојан Секулоски за креирање на авантуристичкиот филм „ Антипод“. Филмското остварување во продукција Авард Филм и Бабот Медиа неодамна беше прикажано во Прилеп на Меѓународниот филмски фестивал Винтер Априкот, се прикажува во кината во Скопје.
Наскоро авантуристичкиот филм „ Антипод“ со главниот протагонист Дарко Неданоски ќе ја доживее и меѓународната презентација на 40 филмски фестивали низ Европа и светот.
„Решивме дека ќе направиме два рекорди во еден ден: нуркање во пештерата Кршална и потоа веднаш се транспортиравме тука во Прилеп на локалитетот Камена Баба каде што одлучив дека ќе ја качувам таа карпа „фри соло“ без никаква помошна опрема, без јаже, без никаква осигурителна опрема и материјално технички помагала кои што инаку ги користиме во искачувањето. При тоа единствено користев патики и торбичка со магнезиум за сузбивање на потењето на рацете при качувањето и секако имав Гоу про камера на мене за да го документирам настанот“, вели Дарко.
Во коштец со недопрените граници секогаш има ризик, но и одредена тензија водени од адреналинот да се достигне поставената цел. Уште повеќе бидејќи практично самостојно без помош се рушат рекордите на неиспитани локации во подземни пештери или пак на стрмни необезбедени височини. Како Дарко се бори со внатрешните пориви, со стравот, со чувствата, за посакуваниот дострел да се изведе прецизно и безбедно? :
„Ова беше една голема и тешка комбинација за да се стигне до целта во еден ден. Мораше да работам макотрпно на физичкиот и психичкиот дел. Една мала грешка, нема повеќе враќање од тоа. Мораме да ги контролираме тие чувства кога знаеме дека е најтешко оти едно мало невнимание макар тоа да било ветер или ситна прашина може да не’ дефокусира и да ни направи проблем. Во искачувањето на карпата Камена Баба која има 40 метри височина вертикала имав таков момент над 15 тиот метар. Има една тераса која што е хоризонтална и каде можам да застанам и се свртив и ја видов долу екипата од птичја перспектива многу малечки… Помислуваш -добро стасав тука, но сега што се случува?! Одам нагоре…. Но, тие се кратки моменти кои што мораш да се бориш со себе си и секако крајната цел е многу важна затоа што не се смеат да се дозволат едни такви недоразбирања внатре во мене и се’ да се искомплицира“, рече Дарко Неданоски, неуморниот спелеолог, дел од спасителската служба, херој кој не познава граници кога станува збор за спасување животи и рушење рекорди.
