Оваа година земјоделската сезона се одвојува од последните неколку по изненадувачки атмосферски влијанија, дождови, температурни скокови, топла зима, нестабилна, врнежлива и студена пролет. Расадувањето на тутунот и градинарските култури започна многу рано, на почетокот од мај, но се одолговлечи поради нестабилните временски услови. На што треба да се обрнат внимание и што е потребно да преземат тутунарите и градинарите во такви услови, ја запрашавме Ели Ристеска, агроном од Земјоделската аптека Фиталија.
– Оваа година треба многу внимателно, континуирано обрнување внимание на самата култура, поради тоа што од една страна дождовите, имаме секакви (кисели дождови), а на зголемена влага се јавуваат сите патогени и габични инфекции. Од друга страна има температурни скокови што е доста стресно за самата култура. Ако е доволно добро заштитен расадот, тоа не значи дека е заштитен и на нива, од самата влага ние не знаеме што може да се случи на нивата. Затоа, треба после 1 недела од расадувањето или од 7 до 10 денови земјоделците да ставаат ѓубрива кои што покрај хумусната материја, треба да содржат одбрамбен систем.
Тоа значи нивата да има прихрана, но и да може да ја издржи вегетацијата на една култура. При тоа да се има во предвид дека поради зголемената атмосферска влага и во почвата, годинава има зголемен број на болести и на мутации и затоа потребно е да се зголеми, да се подобри имунитетот на растението. Годинава има многу трипс, кој што ја намалува силата на самата култура, листот почнува да се завиткува, да венее, да слабее, да ја губи бојата, а овој инсект пренесува многу вируси. Земјоделците треба да ја следат состојбата и да бараат соодветни комбинирани програми за прихрана и заштита, посочува Ристеска од Земјоделската аптека Фиталија.
Проследете го целиот разговор во студио и за конкретните препарати поединечно во Земјоделската аптека Фиталија
