Заедничка изложба на уметнички од нашата држава и Германија е отворена синоќа во ЦК „Бели мугри“ со наслов „Исток се сретнува со Запад 2“.
„Станува збор за циклус кој го започнав со цел да ги зближиме германските и македонските уметнички, поттикнувајќи соработка и културна поврзаност“, изјави за Радио Кочани, Ирена Паскали, идеен творец на оваа културна иницијатива.
На чинот на отворањето во „Фоајето 2“ на кочанската Национа установа присуствуваше и германската амбасадорка во Македонија, Петра Дрекслер.
Меѓу изложениот материјал се наоѓаат дела од ликовните уметнички од нашата средина Марија Мицова Гацова и Александра Димитрова, која пред присутната публика ја претстави носечката идеја за овој циклус, за кој Ирена Паскали, Македонка која живее во Германија, вели дека уметноста воопшто е универзален дијалог што не признава граници.
Директорката на „Бели мугри“, Габриела Стефановска, пак, рече дека задоволство претставува што Истокот и Западот се среќаваат и запознаваат токму кај нив во Центарот за култура и што Ирена Паскали избра две наши роднокрајни уметнички да бидат дел од нејзината замисла за заедничка изложба.
Содржината на објавата е сопственост на Радио Кочани.
