Македонската Втора лига останува со еден клуб помалку. Победа објави дека поради финансиски проблеми се повлекува од понатамошно натпреварување. Еден од најкултните македонски фудбалски брендови, ФК Победа од Прилеп, повеќе не постои на натпреварувачката мапа. Преку официјално соопштение до јавноста, денеска клубот потврди дека сениорската екипа ја напушта Втората македонска фудбалска лига (ВМФЛ) поради целосен финансиски колапс и институционален ќор-сокак.
Проблемите на Победа кулминираа по промената на сопственичката структура во април 2025 година. Новиот мнозински акционер, според соопштението, од самиот почеток покажал незаинтересираност за водење на клубот, не назначувајќи легитимно раководство ниту извршен директор. Моменталната состојба на клубот е блокирана жиро-сметка и без никакви приливи за основните трошоци, па Победа го прекине натпреварувањето.
„Во овој момент клубот е со блокирана сметка и во крајно очајна финансиска ситуација, поради што ја известуваме јавноста дека сениорската екипа на ФК Победа Прилеп не е во можност да го продолжи натпреварувањето во Втората лига“, стои во официјалното известување од 10.02.2026 година кои ви го пренесуваме во целост
„Да ја појасниме моменталната ситуација во нашиот клуб. Во месец април 2025 година дојде до промената на мнозинскиот акционер на нашиот клуб. Новиот мнозински акционер е со став дека не сака да го води клубот, па така на единственото легитимно и легално акционерско собрание не постави лица кои би раководеле со клубот и не назначи извршен директор. Пред почетокот на новата натпреварувачка сезона, во месец август се бараше заедничко решение со градоначалникот и Општина Прилеп, па поради краткиот временски период за делување се донесе привремено решение и се постави одговорно лице со цел клубот да продолжи да функционира до изнајдувањето на долгорочно решение. На советот на Општина Прилеп беше изгласана одлука за доделување на еднократна финансиска помош во висина од 1.000.000,00 денари, која не беше исплатена поради распишувањето на локалните избори, а истата до денес не е исплатена, што воедно беше и услов за клубот да се натпреварува во сезона 2025/2026 во 2.МФЛ. Во овој момент клубот е со блокирана сметка и во крајно очајна финансиска ситуација, поради што, ја известуваме јавноста дека сениорската екипа на ФК Победа Прилеп не е во можност да го продолжи натпреварувањето во втората македонска фудбалска лига.“ стои во соопштението до јавност.
Ова е огромен удар за Прилеп, градот кој живее за фудбалот, и за сите искрени љубители на спортот во Македонија. Победа, клубот кој играше европски натпревари и носеше трофеи, денеска стана жртва на лошо менаџирање и бирократски лавиринти.
Победа зимава не ги почна подготовките за пролетниот дел и не одигра ниту една преијателска, што беше сериозен знак дека нешто лошо се подготвува. Сезоната во втората лига продолжува на 21 февруари, а поради откажувањето на Победа секое коло по една екипа ќе биде слободна, почнувајќи од Новаци, кој нема да патува за Прилеп.
Инаку, клуб Победа беше формиран на 14 мај 2010 година откако вистинската Победа доби 8-годишна забрана за натпреварување од ФИФА поради наместениот натпревар од квалификациите за Лигата на шампионите против ерменскиот Пјуник. Првично формиран под името Викторија, за брзо се преименува во Победа Јуниор, за подоцна да стане само Победа. А, суспендираната Победа имаше обид да се врати по истекот на осумте години, но бараше од ФФМ да продолжи од првата лига, додека ФФМ порача дека треба да почне од општинската лига, по што се откажа.
