Стопанската комора на Македонија информира дека веднаш по избивањето на големиот пожар во фабриката „Макпрогрес“ во Виница се вклучила во координацијата за справување со последиците, а биле алармирани и надлежните државни институции.
Од Комората најавија дека заедно со сопственикот на компанијата ќе биде формиран кризен штаб, со цел побрзо нормализирање на состојбата и поддршка на процесот на обновување.
Притоа беше изразено жалење за големата материјална штета и за сериозните последици врз работењето на компанијата.
Според соопштението, информацијата за пожарот до Комората стигнала вчера околу 19:20 часот, кога претседателот Бранко Азески бил контактиран од првиот човек на „Макпрогрес“, Глигор Цветанов.
Веднаш по тоа била известена Владата, а премиерот и дел од министрите дале насоки за интервенција на терен.
И покрај вложените напори, три производствени погони се целосно уништени.
Од Комората потсетуваат дека „Макпрогрес“ е долгогодишен и значаен член, препознаен како еден од најуспешните македонски извозници, особено во кондиторската индустрија преку брендот „Винчини“.
Оваа компанија не е важна само за регионот и за стопанството во земјата, туку и за самата Комора, бидејќи со своите активности и ангажман континуирано придонесува за создавање подобра бизнис клима, наведуваат од институцијата.
Содржината на објавата е сопственост на Радио Кочани.
