Сто дена по трагичниот пожар во дискотеката „Пулс“ во Кочани, во кој животот го загубија 62 лица, јавноста сè уште чека одговорност и правда. Семејствата на настраданите, повредените и преживеаните денеска преку социјалните мрежи и јавни обраќања повторно упатија потресни сведоштва и апели до институциите.
Граѓанската иницијатива „Кој е следен?“ организираше акција пред клучните институции во Скопје, испраќајќи 100 пораки – симболични критики и повици за суштински реформи во системот.
„Овие 100 пораки не се минливи желби или реторички прашања. Тие се реални критики до нефункционалниот систем“, порачаа од иницијативата.
Инаку истрагата сè уште е отворена во Обвинителството за гонење организиран криминал и корупција (ОЈОГОКК), каде се испитува и одговорноста на полициските службеници кои кобната вечер биле на увид во дискотеката.
Додека семејствата и јавноста чекаат одговорност, институциите и натаму се во процес на усогласување за тоа каде и кога ќе започне судскиот процес – процес што многумина го гледаат како тест за правосудниот систем во земјата.
Содржината на објавата е сопственост на Радио Кочани.
