Втората македонска фудбалска лига (ВМФЛ) доби два старо-нови учесници, во името на екипите на Тетекс и Слога Виница, а уште еден тим се враќа по долго време, тоа е Шкендија Арачиново.
ГФК Осогово – Шкендија Арачиново 1-2:
Тимовите кои беа најдобри во своите третолигашки региони доминантно дојдоа до промоцијата која ја посакуваа цела сезона. Шкендија Арачиново во тензичен меч на Градскиот стадион во Кавадарци славеше над ГФК Осогово со 2-1 и така веројатно ги испрати „жетварите“ во Трета лига, а себеси си обезбеди сигурна промоција.
Во првиот дел кој го одблежа и прекин заради националистичко навивање, резултатот го отвори Александар Ѓоргиевски од пенал, а во 51. минута преку младиот Симовски, Осогово дојде на 1-1. Моментот на одлука на мечот беше во 58. минута, кога Бујар Иљази биеше од далечина за 2-1 и триумф на арачиновци.
Тетекс – Големо Коњаре 2-2 (4-3):
Тетекс имаше предност од 2-0 против Големо Коњаре, но во финишот во една минута прими два евтини гола, па средбата заврши 2-2 и одлучија пеналите. Тетовчани имаа предност со головите на Ерјон Елмази и Азис Јамини, додека коњарци се вратија во 89. и 90. минута преку Зоран Котески и Беким Алимоски. Во шутевите од белата точка, „штофарите“ беа поуспешни со 4-3.
Преспа – Слога Виница 0-3:
Слога Виница беше сигурна во дуелот со Преспа и славеше со 3-0. Стрелци за виничани на овој меч беа Дарко Стојанов, Филип Петковски и Љупчо Христовски.
Учесници во новата сезона на ВМФЛ се Брегалница, Детонит Плачковица, Саса, Охрид, Беласица, Кожуф, Скопје, Новаци, Победа, Вардар Неготино, плус Шкендија Арачиново, Тетекс и Слога Виница. Уште еден клуб ќе биде познат по баражот Беса – Башкими, а последните два тима ќе бидат познати по извлекување ждрепка.
Gol.mk
Содржината на објавата е сопственост на Радио Кочани.
