Во 10 коло од Супер машката ракометна лига, ракометарите од Прилеп на домашен терен, вечерва изгубија од помоќниот противник, Еурофарм Пелистер со 25:40 (12: 21).
Тоа беше натпревар меѓу Давид и Голијат. „Џиновскиот“ тим на Еирофарм Пелистер само беше домашна атракција за прилепската публика, која сакаше да го види македонскиот ракометен шампион во Прилеп и да ужива во ракометни мајстории.
Пелагониското дерби започна со водство на домашните, но гостите веднаш ја потврдија својата надмоќност и резултатот 2-4 се создаде за 3 минути. Прилепчани имаа нерешен резултата во 7 минута (4:4) и му парираа на противникот до 10 минута, но потоа настапи „силата“ на Еурофарм Пелистер и со брза динамика во играта настана резултатската промена која се менуваше од минута во минута, да од 24 минута домашните да останат на 12 постигнати голови, а во нивната мрежа да се нанижат 21 гол. Па, на полувреме се замине со висока резултатска предност за гостите од 9 гола – 12:21.
Второто полувреме, иако прилепчани успеваа да парираат уште десетина минути, тоа сепак беше само рутинска игра, во која домашните постигнаа 13 голови, а гостите 19 голови, за победата на крајот од натпреварот да биде „запечатена“ со 15 гола разлика и да ѝ припадне на шампионот.
За Еурофарм Пелистер ова беше тренинг натпревар, во кој тренерот Рубен Гарабаја ротираше со своите играчи, а за ракометарите на Прилеп, можност да ја почувствуваат поквалитетна ракометна игра и да дадат солиден отпор на посилниот противник, кој немилосрдно ја полнеше нивната мрежа.
Се на сè убава ракометна забава во која ракометната прилепска публика уживаше и не заборави да се слика со ракометните ѕвезди и македонски ракометни идоли: Никола Митревски, Жарко Пешевски, Филип Кузмановски …
Инаку, Петар Атанасијевиќ со седум и Мирче Калајџиовски со шест гола го предводеа Еурофарм Пелистер до победата, а во таборот на Прилеп Ангел Крстевски имаше „седум од седум“ реализации.
