На домашен терен, на реновираниот и подготвен фудбалски стадион во Големо Коњари утре истоимената екипа ќе го игра сефтето во Втората фудбалска лига. Првиот првенствен дуел дома е на 23 август, од 17 часот со Детонит Плачковица од Радовиш. На голема радост од публиката, освежениот и подновен фудбалски тим на Големо Коњари ќе може да настапува на домашниот терен за кој што даде дозвола и ФФМ, иако неизвесноста за користење на стадионот за официјални натпревари постоеше поради недостиг од трибини.
Во реновирањето на просториите, подновувањето и одржувањето на тревнатиот терен практично учествуваше целото село, кој колку што може да помогне со работна рака или парични средства, иселеници, а помогнаа и компании со донации. За рекордно време возобновени беа соблекувалните, а објектот и надворешно е саниран и целосно прилагоден кон стандардите за натпревари во Втората фудбалска лига.
ФК Големо Коњари го освежи и играчкиот кадар со млади талентирани играчи, предводени од Зоран Даноски, кој со своето богато прволигашко искуство треба да даде дополнителен поттик за успех на целата екипа предводена од тренерот Јовица Блажевски.
Прилепска Победа пак, настапува на гостински терен во Новаци со истоимената екипа.
