На редовните директни внатрепартиски избори СДСМ денеска го избира Венко Филипче како единствен кандидат за лидер на партијата . Околу 24 илјади членови гласаат на 78 избирачки места низ државата. Гласањето се одвива од утрово, а избирачките кутии ќе бидат затворени во 20 часот.
Филипче беше единствено име на гласачкото ливче. На претходните избори Венко Филипче имаше тројца противкандидати, Деспотовски, Петровска и Бајдевски кои во предизборниот период обвинуваа за нерегуланости и нефер изборна трка, поради кои Петровска два дена пред изборите се повлече. Но, и покрај ова Филипче тогаш победи со освоени над 50% од запишаните членови за гласање.
Филипче за лидер беше избран во јуни минатата година на вонредните избори кои СДСМ ги организираше по оставката на Ковачевски поради историски лоши резултат на парламентарните и претседателските избори. По денешните избори Филипче ќе има мандат од 4 години.
Првично закажаните партиски избори на 16 март, беа одложени поради трагедијата во Кочани.
