Во рамките на проектот „Чистиот воздух стандард во градинките во Прилеп“, Ротари клубот Прилеп опреми уште две детски градинки во градот со професионални прочистувачи на воздух, со најсовремени филтри од реномиран производител. Во оваа прилика прочистувачи за воздух добија градинките „Тризла“ и „Гоце Делчев“. Ротари клубот Прилеп донираше вкупно осумнаесет прочистувачи на воздух и на овој начин, ја заокружи акцијата за целосно опремување со вакви уреди на вкупно четири детски градинки во градот.
Вкупната вредност на донацијата во сите градинки е околу 16 илјади евра. Целта е да се обезбеди ниво на суспендирани честици во воздух (ПМ 2.5 и ПМ 10) во градниците на нормалата и да се овозможи децата да дишат чист воздух во градинките каде што поминуваат поголем дел од денот. Покрај тоа, прочистувачите обезбедуваат заштита и од вируси, бактерии и алергени, што исто така е многу важно кога станува збор за заштита на здравјето на најмладата популација. Интенцијата на Ротари клубот Прилеп е проектот да продолжи и во наредниот период.
