Речното корито на реката Осојница кај мостот пред влезот во селото Виничка Кршла е исчистено и регулирано, со што се решава децениски проблем на барање на жителите.
Со стабилизацијата на овој потег значително е намален притисокот врз столбовите на мостот, а воедно е отстранета и опасноста од евентуални штети и поплави на бунарите за водоснабдување кои се наоѓаат во непосредна близина.
Паралелно со овие активности, по подолг временски период започна и кастрење на дрвјата долж булеварот „Маршал Тито“.
Според најавите, ќе се врши и целосно сечење на стари и проблематични дрвја, по претходна проценка и решение издадено од надлежната Комисија за сечење на дрвја на јавно-прометни површини.
Како што истакна градоначалникот на Општина Виница, Митко Костадиновски, за Радио Кочани, овие активности се дел од континуираните напори за зголемување на безбедноста, заштита на инфраструктурата и унапредување на квалитетот на животот на граѓаните.
Од ЈП „Солидарност“ информираат дека кастрењето и сечењето на дрвјата се сложени и долготрајни операции, поради што се апелира до граѓаните за разбирање, а особено до возачите за внимателност и трпеливост, како и да не ги паркираат своите возила на локациите каде што се изведуваат работите.
Содржината на објавата е сопственост на Радио Кочани.
