Вие сте доказ дека македонскиот бизнис има иднина! На ваков начин им се обрати генералниот менаџер на Макпрогрес Груп од Виница, Глигор Цветанов, на дипломците од четвртата генерација на Академијата за претприемништво и менаџмент на Прогресив Академијата, денеска, при врачувањето на сертификатите, со што заврши уште еден циклус на образование и практична подгтовка на младите претприемачи и менаџери.
Тие, со ова, според Цветанов, излегуваат подготвени да одговорат на современите предизвици.
Истовремено, на свеченоста, денеска во Прогресив Академијата, беше означен стартот на новата петта генерација на претприемачи и менаџери со што се отвора ново поглавје во создавањето идни лидери и визионери во бизнисот, смета тој.
Генералниот менаџер на Макпрогрес Груп од Виница, Глигор Цветанов, зборувајќи пред завршените студенти на четвртата и пред новите, од петтата генерација што сега ја започнуваат едукација, истакна дека за него Академијата за претприемништво и менаџмент има посебна вредност, појаснувајќи дека и самиот минал низ многу обуки за менаџери, кои го подготвиле за мигови, кога животот и бизнисот ќе ве стават на испит, потсетувајќи на пожарот во фабриката од пред дваесетина дена, во кој изгоре еден производен погон и три магацини.
Оваа криза беше суров доказ дека секој бизнис носи ризици. Но, во исто време беше и моја најголема лекција – дека токму принципите на Прогресив Академијата се тие што прават разлика: брзината на одлука, решителноста, истрајноста и лидерството. Верувам дека и сите вие, кои денес излегувате како дипломирани прогресивци, сте подготвени да бидете токму такви лидери – кои нема да се скршат во криза, туку ќе израснат уште посилни, нагласи генералниот менаџер н Макпрогрес Груп, Глигор Цветанов.
Обраќање на свеченост имаше и Бранко Азески, претседател на Стопанската комора на Македонија. Азески, во улога на претседател на Одборот на директори на Прогресив Академијата потенцираше дека оваа институција претставува столб на современото менаџерско и претприемничко образование во државата.
Преку вакви иницијативи создаваме генерации на нови лидери кои ќе бидат двигател на развојот, иновациите и конкурентноста на македонската економија, нагласи претседателот на Стопанската комора, кој е еден од основачите на Прогресив Академијата.
ВоПосетителите на петтата генерација на Академијата за претриемништво и менаџмент денеска ја започнаа едукацијата и обуката која ќе се одвива во наредните шест месеци. Во програмата ќе бидат опфатени : деловна стратегија и бизнис процеси, организациска трансформација, корпоративна иновација, маркетинг и продажба, финансии за топ менаџмент и лидерство и деловни комуникации.
Содржината на објавата е сопственост на Радио Кочани.
