Густ, црн, висок чад попладневно се издигна над Прилеп, од кај дабничкиот предел. Од Дирекцијата за заштита и спасување ДЗС информираа дека горела поголема количина смет на тој дел од градот, на локација која е претворена во депонија и каде што со месеци се фрла ѓубре.
Од ДЗС информираат дека ТППЕ – Прилеп веќе интервенирала. Надлежните апелираат граѓаните да се воздржат од палење отпад, сува трева и гранки, бидејќи огнот брзо се шири, особено при ветровито време. Локалните служби препорачуваат жителите во близина на пожарот да ги затворат прозорците, да избегнуваат престој на отворено и, доколку чувствуваат непријатност од чадот, да користат маски или марами како привремена заштита.
Во случај на влошување на состојбата или ширење на огнот, граѓаните да се јават на 193 или 112.
Инспекциските служби најавуваат контроли на локациите каде што се создаваат диви депонии, со цел превенција на нови пожари и утврдување одговорност за несовесно депонирање отпад.
